Жаңа оқу жылының басталуымен бірге қала мектептерінде балалардың қауіпсіздігін қамтамасыз ету мәселесі ең өзекті мәселеге айналды. Биыл облыс бойынша 339 мектепте 189 288 бала білім алуды жоспарлап отыр. Сондықтан әрбір оқушының мектепке бару және қайту жолындағы, сондай-ақ мектеп ауласындағы қауіпсіздігі күн тәртібінен түспейді.
Полиция департаменті өкілдерінің мәліметінше, жаңа оқу жылы қарсаңында жол-көлік оқиғаларының алдын алу шаралары күшейтілуде. ОПД Жергілікті полиция қызметі басқармасы бастығының орынбасары Мейрамбек Манатов пен Әкімшілік полиция басқармасы бастығының орынбасары Нұркен Бақтияровтың айтуынша, «Білім күніне» арналған арнайы іс-шаралар жоспары әзірленіп, облыс бойынша қоғамдық тәртіп пен жол қауіпсіздігін қамтамасыз етуге 594 қызметкер және 139 қызметтік автокөлік жұмылдырылған.
Осы шаралардың аясында мектептер мен оған іргелес аудандарда оқушылар арасында келеңсіз жағдайлардың алдын алу, сондай-ақ қоғамдық қауіпсіздікті сақтау мақсатында қосымша бақылау күшейтілген. Ата-аналарға балалардың түнгі уақытта қоғамдық орындарда болмауын қатаң бақылау, сондай-ақ 1-4 сынып оқушыларын тек өздері алып қайту қажеттігі ескертілуде.
Департаменттің Әкімшілік полиция басқармасы қызметкерлерімен қала мен аудан орталықтарындағы мектеп маңындағы көше-жол тораптарында орналасқан техникалық құрылғылар мен жол белгілеріне зерделеу жұмыстары жүргізілді. Анықталған кемшіліктерді жою үшін қала және аудан әкімдеріне 30 хабарлама-ұсыныс пен 177 нұсқама жолданды. Қазіргі таңда 67 жол белгісі мен 29 жасанды тегіс-еместік қондырғысы қалпына келтіріліп, жаңадан 72 жол белгісі орнатылды, сондай-ақ 110 жерде жаяу жүргінші жол үсті таңбалары жаңартылды.
Осы шаралар қала мектептеріндегі балалардың қауіпсіздігін арттыруға бағытталған және оқушылардың жолдағы, мектеп ауласындағы амандығын қамтамасыз етуге зор үлес қосады.
