Қазыналы ауылдың қазіргі күйі ерек. Бүгінде Талсуат ауылдық округінде 2465 адам қоныстанған. Экономикалық белсенді халық саны 1253 болса, өзін-өзі жұмыспен қамтығандар – 150. Жыл басынан 15 тұрғын тұрақты жұмыспен қамтылған болса, «2021-2025 жылдарға арналған кәсіпкерлікті дамыту жөніндегі ұлттық жобасы» аясында 23 адам ақылы қоғамдық жұмысқа тартылған екен.
Әрине, әлеуметтік қолдаусыз ауылды өркендету мүмкін емес. Бұл орайда талсуаттықтардың ұпайы түгел. Ауылдағы әлеуметтік жағынан аз қамтылған отбасылар да назардан тыс қалмай, мемлекет қамқорлығына алынған. Жыл басынан аз қамтылған 33 отбасына 8 701 482 млн теңге көлемінде атаулы әлеуметтік көмек тағайындалды. Ауылдық округ тұрғындарын міндетті әлеуметтік медининалық сақтандыру шеңберінде Талсуат ауылдық округінде медициналық амбулатория алғашқы көмек беріп, дәрі-дәрмекпен қамтуда. Мұнда 2 дәрігер, 6 жалпы тәжірибелік аяжан, 1 ем-шара бөлімінің аяжаны тұрғындарға медициналық қызмет көрсетеді.
Тұрғындардың көптен бері көтеріп жүрген ауылдық округтегі әлеуметтік қызмет көрсететін 3 мекемеге жаяу жүргінші жолын салу мен көше жарығын жүргізу мәселесі шешімін тапты. Жобаның сметалық құжаты «Қызылорда қалалық тұрғын үй-коммуналдық шаруашылық және тұрғын үй инспекциясы» тарапынан әзірленіп, 2025 жылы қалалық бюджеттен толық көлемде қаржыландырылды. Мемлекеттік сатып алу конкурсының нәтижесі бойынша мердігер мекемемен құны 75,8 млн теңге қаржы бөлініп, жұмыс толық аяқталды.
– Ауылдық округтегі 1-ші тұйық көшеге жарық бағаналары орнатылды. Жоба құны 2 млн 341 мың теңгені құрайды. 3-ші тұйық көшеге де тас төселіп, оған 13 млн 279 мың теңге қаржы қаралды.Сонымен қатар Тағзым алаңы абаттандырылып, ағымдағы жөндеу жүргізілді. Құны 4,992 мың 152 теңгені құрайтын құрылысты мердігер мекеме «ALYSER» COMPANY ЖШС орындады.Самаладай жарық көшелермен тұрғындар емін-еркін жүретін болды. Мәселен биыл Астана, Алматы, Ақмешіт, Отырар, О.Сауытбаев, С.Нұрмағамбетов көшелеріне көше жарығы жүргізілді. Оған 51,9 млн теңге бөлінді. Құрылысты «Орда-Құрылыс» мекемесі орындады, – дейді ауыл әкімі.
Табыс торабы
Мұндағы бюджеттің ахуалы да жақсы – биыл 214, 4 млн теңгеге бекітілген. Салықтық түсім 2025 жылға 11 млн 417 мың теңгеге жоспарланса, 10 айда 12 400,6 теңге түсіп, жоспар 108,6%-ға орындалды. Округте 189 шағын кәсіпкерлік нысаны 174 дара кәсіпкерлер, 6 шаруа қожалығы тіркелген, заңды тұлға – 9.
Ауылдық округ әкімі Ерлан Бейсенбаевтың айтуынша, кәсіпкерлікті дамыту жөніндегі мемлекеттік бағдарламамен жыл басынан несие портфелі 85,6 млн теңгені құрайтын 11 жоба мақұлданған.
Айта кетейік, өткен жылы ауылда 7 кәсіпкерлік субъекті тіркеліп, мемлекеттік бағдарламалар аясында ауыл тұрғындарының 11 жобасы қаржыландырылды. Оның ішінде 3 жоба қайтарымсыз грантқа ие болса, «Ауыл аманаты» бағдарламасы аясында 5 жобаға қолдау көрсетілді. Бұл жобалардың ішінде кондитерлік цехы, ысталған балық өндірісі, техникалық жөндеу орталығы, мал басын көбейту бастамалары қамтылған. Ауыл шаруашылығы саласы бойынша 49,2 гектар жерге, оның ішінде 38 га көкөніс, 1,2 га картоп, 10 га бақша дақылдары егіліп, мал саны 2533 басқа жетті.
