Сырдария өзенінің жағалауында орналасқан Қызылжарма ауылы – ғасырлар бойы терең тарихы мен еңбекқор халқы арқылы ерекшеленген мекен. Қаладан бірнеше шақырым жерде жайғасқан бұл ауылдың іргесі 1929 жылы қаланған, сол кезде ол Комсомол деген атпен белгілі болған. Ауылдың атын қалыптастырған оқиға да ерекше: өзеннің сағасынан қолмен қазылған каналдан шыққан қызыл топырақ, тұрғындар арасында “Қызылжарма” деп аталып кеткен. Уақыт өте келе бұл атау ауылдық кеңес пен елдің рухында да орнығып, ауылдың даму тарихын айқындайтын белгіге айналды.
Қызылжарма ауылының ауылшаруашылық саласы көп жылдан бері негізгі тірегі болды. 1950 жылдары бірнеше колхоз жұмыс істеп, ауылдағы шаруашылық пен мал өсірудің даму жолын салды. 1961 жылы Комсомол совхозының құрылуы ауыл өміріне жаңа тыныс сыйлады. 1964 жылы құрылған құс фабрикасы өңір тұрғындарына құс етін тұрақты жеткізіп, ауыл экономикасын нығайтты. Сонымен қатар 1971 жылы Қазалыдан көшірілген ауылшаруашылық техникумы ауылдағы білім беру саласын жаңа деңгейге көтерді.
Ауылдың дамуына үлес қосқан еңбекқор азаматтар да аз емес. Қалмақ Сексенбаев, Баян Піржанова, Несібелі Ибраева, Қатшагүл Аралбаева сынды елге сыйлы тұлғалар ауылдың өсіп-өркендеуіне өз үлестерін тигізді. Қазіргі таңда Қызылжармада 9 мыңнан астам тұрғын бар, бұл көрсеткіш тұрақты түрде артып келеді.
Инфрақұрылым жағынан да ауыл заманауи талаптарға сай. Мұнда мектептер, мәдениет үйлері, кітапханалар, емханалар және балабақшалар бар. Көгілдір отын, сапалы жолдар және басқа да коммуналдық қызметтер ауыл тұрғындарының тұрмысын жақсартып отыр. Жақында 600 орындық “Жайлы мектеп” құрылысы басталып, білім саласы тағы бір қадам алға басуда.
Қызылжармада кәсіпкерлік те қарқынды дамып келеді. 2025 жылдың алғашқы жартыжылдығында ауылда 494 кәсіпкерлік нысан тіркелген. Оның ішінде жеке кәсіпкерлер мен шаруа қожалықтары молшылықпен жұмыс істеуде. Мемлекеттік бағдарламалардың арқасында көптеген кәсіпкер жеңілдетілген несие алып, жаңа жобаларды іске асыруда. “Іскер” бағдарламасы және “Ауыл аманаты” сияқты қолдау құралдары ауыл тұрғындарына бизнес ашуға зор мүмкіндік беруде. Биыл 10 жоба 400 АЕК көлеміндегі грантқа ие болып, жастар мен әйелдер кәсіпкерлігінің дамуына серпін берді.
Шаруашылық бағытында да ауылдың қолы толған. Қазір 16 шаруа қожалығы тұрақты жұмыс жасап, мал шаруашылығын дамытып келеді. “Береке-Агро”, “Кушимбаев-Агро” және “Жұмабай” сынды қожалықтар мемлекеттік қолдау арқылы асыл тұқымды мал өсіріп, өндірісті кеңейтуде. Ешкі сүтінен өнім өндіретін кәсіпкерлік те кеңінен танымал болуда.
Ауылда кәсіпкерлік қызметтің көріністері – бұл жай сөз емес, нақты жүзеге асқан жобалар. Мысалы, “Таза” моншасының ашылуы – ауылға жаңа тыныс берді. Кәсіпкер Аида Ибраева 6% жеңілдетілген несие арқылы монша салды. Қызмет сапасы жоғары, тұрғындар тарапынан сұраныс үлкен. Қыс мезгілінде бұл кәсіптің маңызы айрықша.
Сонымен қатар, кәсіпкер Анар Бажакова ауылдағы ғимараттарды сәндік панельдермен қаптау арқылы кәсібін кеңейтті. Ол қызметін тек ауылда ғана емес, көрші өңірлерде де көрсетіп, облыстық деңгейге көтерді. Бұл ауыл кәсіпкерлерінің кәсібін дамытып, ауылдың абыройын арттыруға қосқан үлесі.
Қызылжарма ауылы – тарихы терең, бүгіні мен ертеңі жарқын, кәсіпкерлік пен шаруашылыққа мол мүмкіндік беретін ерекше мекен. Мұнда әрбір азаматтың еңбегі мен талабы бағаланып, мемлекет тарапынан қолдау көрсетілуде. Ауыл өмірінің бүгінгі шынайы көрінісі – еңбек пен табандылықтың жемісі.
