18 ақпан күні К. Бәйсейітова атындағы Қазақ ұлттық өнер университетінің Үлкен концерт залында Тәрбие жұмысы және жастар ісі бөлімі мен қаламыздың құзырлы органдарының ұйымдастыруымен «Заң мен тәртіп» тақырыбында студенттермен кездесу өтті деп хабарлайды salemnews.kz ақпарат агенттігі. Аталған шараға Астана қаласының Прокуратурасы, Ішкі істер органдарының қызметкерлері және дінтанушы мамандар қатысты.
Кездесуге университет ректоры Ғалым Алгиұлы, барлық факультеттердің декандары, кураторлар мен профессор-оқытушылар құрамы толық қатысып, жастарға құқықтық және рухани бағытта маңызды ақпараттар берілді.
Отырысты Астана қаласы Дін істері жөніндегі басқармаға қарасты «Қамқор-Астана» қоғамдық қорының дінтанушы маманы Қуатов Арулан мырза жүргізді. Ол студенттерге діни тұрғыда өзін дұрыс ұстаудың маңызын түсіндіріп, қазіргі интернет кеңістігінде діни мазмұндағы түрлі видеоларды тиісті мамандармен ақылдаспай жариялауға қатаң тыйым салынғанын атап өтті.
Сонымен қатар, нақты мысалдар келтіріп, түрлі бейнематериалдар арқылы тақырыпты жан-жақты талдап өтті.
Келесі сөз кезегі Астана қаласы Сарайшық аудандық полиция басқармасының киберқылмысқа қарсы күрес бөлімінің жедел уәкілі, полиция капитаны Қалмағамбетов Ғалымжан Бауыржанұлына берілді. Ол қазіргі таңда интернет алаяқтық фактілерінің көбейгенін айтып, әсіресе өзін ЦОН немесе банк қызметкері ретінде таныстырып, 1414 нөмірінен келген SMS-хабарламаларға аса мұқият болу керектігін ескертті. Спикер бейнеслайдтар арқылы көптеген нақты жағдайларды көрсетіп, студенттерді интернет алаяқтарының құрбаны болмауға шақырды.
Сонымен қатар, интернет кеңістігінде кеңінен таралған дропперлік алаяқтық мәселесі бойынша Сарайшық аудандық полиция басқармасының зорлық-зомбылыққа қарсы күрес бөлімінің инспекторы, полиция капитаны Мейрамова Асма Тұрлыбекқызы баяндама жасап, студенттерге алаяқтардың айла-тәсілдеріне алданбау жолдарын түсіндірді.
Кездесу барысында Прокуратура өкілі Әзілхан Сангалиев мырза студенттер мен оқытушылар тарапынан қойылған сұрақтарға тұшымды әрі нақты жауаптар берді.
Сондай-ақ, осы күні «Есірткі мен құқықбұзушылықтың алдын алу» тақырыбында Прокуратураның ұйымдастыруымен түсірілген қысқаметражды фильмдер көрсетілді. Аталған фильмдер шынайы өмірде болған оқиғалар желісі негізінде түсірілген.
Фильмдерде басты рөлдерді сомдаған университетіміздің «Драма театры және кино әртістері» мамандығының 2-курс студенттері – Тілектес Мейрамов шеберханасының тәрбиеленушілері Жұмабаева Света, Амангелді Бекзат және Рахимов Мирас сахна төріне шақырылып, университет ректоры Ғалым Алгиұлының қолынан естелік сыйлықтармен марапатталды.
