«Қазгидрогеология» ұлттық гидрогеологиялық қызметінің мамандары Жамбыл облысындағы бұлақтарды зерттеу және түгендеу бойынша далалық жұмыстар жүргізді. Бұл іс-шаралар Қазақстан Республикасындағы бұлақтардың бірыңғай деректер базасын қалыптастыру аясында жүргізіліп жатыр. Елде алғаш рет бұлақтарды түгендеумен қатар, әрбір табиғи су көзі бойынша жүйеленген мәліметтерді қалыптастыра отырып, оларды паспорттау жұмыстары жүргізілуде, деп хабарлайды salemnews.kz ақпарат агенттігі.
Далалық жұмыстар барысында өңірдегі 574 бұлақ зерттелді. «Қазгидрогеология» мамандары бұлақтардың санитариялық және техникалық жағдайына бағалау жүргізіп, олардың координаттарын нақтылады, гидрогеологиялық бақылаулар жүргізді және зертханалық зерттеулер үшін су сынамаларын алды. Зерттеу нәтижелері бойынша бұлақтардың орналасқан жері, жағдайы, гидрогеологиялық сипаттамалары және су сапасы туралы негізгі мәліметтер қамтылатын паспорттар әзірленіп жатыр. Алынған деректер табиғи су көздері туралы мәліметтерді өзектендіруге және оларды одан әрі есепке алып, мониторинг жүргізуді қамтамасыз етуге мүмкіндік береді.
«Келесі жылы Алматы облысында 600-ге жуық бұлақты зерттеу, ал 2028 жылы Жетісу облысында шамамен 500 бұлақты зерттеу жоспарланып отыр. Бұлақтарды жүйелі түрде паспорттау жұмыстары алғаш рет жүргізіліп жатқанын атап өткен маңызды. Жүргізіліп жатқан жұмыс бұлақтардың жай-күйін жақсы түсінуге, оларды сақтау бойынша уақытылы шаралар қабылдауға және олардың әлеуетін тиімді пайдалануға мүмкіндік беретін заманауи және сенімді деректер базасын қалыптастыру жолымен табиғи су объектілері мен тұщы су көздерін сақтауға бағытталған», — деді «Қазгидрогеология» КЕАҚ басқарма төрағасы Болат Бекнияз.
Еске сала кетейік, «Таза Қазақстан» — Мемлекет басшысы Қасым-Жомарт Тоқаевтың бастамасымен қолға алынған ауқымды республикалық экологиялық акция. Жоба қоршаған ортаны қорғауға, тазалықты сақтауға және ұлттық экологиялық мәдениетті қалыптастыруға бағытталған.
