Тасбөгет кентінің әкімі Айдын Тыныштықбай бұқаралық ақпарат құралдарының өкілдерімен өткен баспасөз конференциясында бірінші жартыжылдықта атқарылған ірі жұмыстарды жариялады.
Инфрақұрылымды дамыту аясында кенттегі жаңа бейіттің қоршау және тегістеу жұмыстары толық аяқталды. Сонымен қатар, 15 миллион теңгеге бірнеше көшенің жөндеу жұмыстары жүргізіліп, 10 көшеге жарықтандыру орнатылды. Қазіргі таңда 16 тұрғын үйдің шатырын жөндеу және ұзындығы 2,7 шақырым болатын жылу құбырының құрылысы жүзеге асырылуда.
Сабалақ саяжайында тұрғындардың көптен күткен газ мәселесі оң шешімін тауып, көгілдір отын желісін тарту үшін 3 кезеңнен тұратын жоба іске қосылды. Жобаның жалпы құны – 3 млрд теңге. Қазіргі таңда ішкі газ желілерін тарту жұмыстары қарқынды жүргізілуде. Сонымен қатар, ауыз сумен қамтамасыз ету де толық шешімін тапты.
Кәсіпкерлікті дамыту да назардан тыс қалған жоқ. Қазіргі таңда кентте 880 кәсіпкерлік нысан тіркелген. Мемлекеттік бағдарламалар аясында 29 тұрғын өз жобаларын қорғап, 72,7 млн теңге көлемінде қаржылай қолдау алды. Бұл кәсіпкерлердің белсенділігін арттырып, жергілікті экономикаға серпін беруде.
