12 тамыз – Халықаралық жастар күніне орай Қызылордада «QYZYLORDA JASTAR FEST» атты мәдени-көпшілік шаралар ұйымдастырылады. Бұл туралы қалалық жастар ресурстық орталығының директоры Медет Жорабек баспасөз брифингінде хабарлады.
8-11 тамыз аралығында жастарының қатысуымен бірнеше іс-шаралар өтеді. Мереке 8 тамыз күні басталып, «Табиғатты сақта – болашақты қорға» атты экологиялық қоқыс жинау сайысы өтеді. 9 тамызда «Qyzylorda Youth Fest» би сайысы ұйымдастырылса, 10 тамызда жастар арасында «Абай сөзі» онлайн челленджі болады.
11 тамызда Орта Азия мен Қазақстан жастарының көшбасшысы Ғани Мұратбаевтың ескерткішіне тағзым ету, «Қызылорда – жастар қаласы» фотокөрмесі, «Шыңды бағындыр» атты турникке тартылу сайысы және «Qyzylorda Youth Fest» мерекелік гала-концерті өтеді.
Бұл шаралар жастардың шығармашылығын дамытуға, экологиялық мәдениетті қалыптастыруға, салауатты өмір салтын насихаттауға және ұлттық құндылықтарды насихаттауға бағытталған.
