Қызылорда облысының іргесіндегі Ақсуат ауылы – «Батыс Еуропа – Батыс Қытай» автодәлізінің бойында орналасқан, қала мен кең дала тоғысқан ерекше бір мекен. Мұнда әр таң жаңа үміт пен еңбекке толы. Күннің шыққан шағы мен егін даласындағы еңбектің дыбысы үйлесім табады. Бұл ауыл тұрғындары үшін еңбек пен табиғат тығыз байланыста, дәстүр мен жаңалық қатар өріп келеді.
Ақсуаттың тарихы да, қазіргі күйі де ауыл адамдарының қажырлы еңбегі мен бірлігінің жемісі. Бастапқыда бірнеше шағын шаруашылықтан бастау алған ауыл бүгінгі таңда іргелі ұжымдарға айналып, халық саны 11 мыңнан асты. Бұл көрсеткіш жыл сайын өсуде, ауыл аумағы кеңейіп, тұрғындар саны көбейіп келеді.
Өткен жылы ауылда 32 көшеге электр желісі тарту жұмыстары басталды. Биылғы жылы да бұл бағыттағы жұмыстар жалғасын тауып, қоғамдық көліктер қатынайтын негізгі көшелердің жолдары жөнделуде. Атап айтқанда, 1,2 шақырымға жуық үш көшеге жарық бағаналары орнатылып, 18 көшеде жол салу мен төрт көшені қайта жаңғырту жоспарланған. Ауыл әкімінің айтуынша, бұл шаралар тұрғындардың қауіпсіздігі мен өмір сүру сапасын арттыруға бағытталған.
Кәсіпкерлік – ауылдың тірегі
Ауылдағы кәсіпкерліктің дамуы тұрақты қарқынмен жүріп жатыр. Соңғы жарты жылда 11 кәсіпкер жеңілдетілген несие алып, олардың сегізі «Ауыл аманаты» бағдарламасы аясында қаржыландырылды. Сонымен қатар, он азамат «Бастау Бизнес» курсын аяқтап, 28,3 миллион теңге көлемінде мемлекеттік грантқа ие болды. Бұл кәсіпкерлердің жаңа жобаларды іске асыруына мүмкіндік беріп, ауыл экономикасын нығайтуға септігін тигізуде.
Ауылда азық-түлік пен құрылыс заттары дүкендері, монша, шаштараз және түрлі қызмет көрсету орындары тұрақты жұмыс істейді. Әр кәсіпкердің еңбегі ауылдың көркеюі мен тұрғындардың тұрмыс сапасын жақсартуға қосқан маңызды үлес болып саналады.
Ауылдың көркін жақсарту мен экологияны қорғау мақсатында да маңызды жұмыстар атқарылуда. Былтыр автодәліз бойына 500 түп ағаш көшеті отырғызылып, қоршау жұмыстары жүргізілді. Биыл бұл бастама шығыс бағытта жалғасын тауып, тағы 300 түп ағаш егілді. «Таза Қазақстан» акциясы аясында ауыл аумағы тұрмыстық қалдықтардан тазартылып, санитарлық тазалықты сақтау жұмыстары жүйелі түрде жүргізілуде.
Шеберлік пен еңбек үлгісі
Мұнда түрлі кәсіппен айналысатын шеберлер көп. Руслан Ержігітов секілді ағаш шеберлері көркем әрі сапалы бұйымдар жасап, ауылдың мәдениетін байытып келеді. Оның қолынан шыққан бұйымдар – нағыз өнер туындылары. Руслан шеберлігін одан әрі дамыту үшін жеңілдетілген несиеге өтініш беріп, кәсібін кеңейтуді жоспарлап отыр.
Ал Жанболат Құрмашев жылыжайында күнделікті көкөністер өсіріп, ауыл тұрғындарын сапалы өніммен қамтамасыз етеді. Оның еңбегі ауыл жастарына үлгі болып, ауыл шаруашылығы саласын дамытуға серпін береді.
Ауылда шағын наубайхана мен тәттілер цехы сияқты әлеуметтік маңызы бар кәсіптер де бар. Ләззат Сейітова өз наубайханасын «Ауыл аманаты» бағдарламасы арқылы ашып, ауыл мен жақын маңдағы кенттерге нан өнімдерін жеткізіп отыр. Шахаризадаханым Батырханова болса, итальяндық круассан дайындайтын цех ашып, қала нарығына да өнімін жеткізуге мүмкіндік алды.
Қарты бар ел қазыналы
Ауылдың қазыналы қариясы Рахымбай ата ауыл өміріне ерекше ықпал етіп келеді. Жастайынан совхозда механизатор болып еңбек еткен ол бүгінде ауылдық кеңестің мүшесі, жастарға ақыл айтып, ауыл бірлігін нығайтуға атсалысып жүр. Оның үйінің ауласындағы жасыл бақ ауылдың тыныштығы мен берекесін білдіреді.
Ақсуат ауылы – еңбек пен ынтымақтың, дәстүр мен жаңалықтың үйлесімі. Мұнда инфрақұрылым жаңарып, кәсіпкерлік дами түсуде. Ауыл тұрғындарының бірігіп, еңбектенуінің нәтижесінде ауыл көркейіп, тыныштық пен береке орнауда. Әкімдік пен халық бірлесе отырып, Ақсуаттың болашағын жарқын етуге күш салып жатыр. Алдағы уақытта да ауылда жаңа жобалар мен әлеуметтік-экономикалық шаралар жүзеге асырылып, тұрғындардың тұрмыс сапасы одан әрі жақсаратынына сенім мол.
