Жуырда қаланың экологиялық болмысын жаңғыртуға бағытталған бірегей жоба – Ботаникалық бақтың құрылысы аяқталмақ. Көптен күткен жоба маусым айында халық игілігіне беріледі. Жаңа бастама несімен маңызды? Ел күткен жобада нендей ерекшеліктер болады? Талдап көрейік.
Ботаникалық бақ Президент саябағы аумағында орналасқан. Құрылысы былтыр басталған заманауи көпфункционалды кешенге 4,9 млрд теңге жұмсалыпты, 2,41 гектар аумақта орналасқан. Бас мердігер «Alem Qurylys AQ» ЖШС жылға жетпейтін уақытта экологиялық мәдениетті қалыптастыратын нысанды салып бітірмекші.
Ботаникалық бақ – экологиялық танымды, туризмді дамытуға және жаңа қоғамдық кеңістіктер құруға бағытталған заманауи көпфункционалды кешен. Алдын ала мәлімет бойынша, бақта жалпы ауданы 1500 шаршы метр болатын екі жылыжай орналаспақ. Онда Африка, Оңтүстік Америка, Австралия, Жапония, Қытай және Мадагаскар сияқты әлемнің әр аймағынан 92 түрлі 3300-ден астам өсімдік егіледі. Веерлі пальма, Канар құрмасы, кактус пен алоэ, вашингтония пальмасы, стрелиция, жакаранда, алып юкка, мақта ағашы, бамбук, сәндік өсімдіктер, кариота жайқалатын күн жақын. Бұл өсімдіктер гүлдегенде хош иісі аңқып, қызғылт сары, көгілдір, күлгін сияқты алуан түске боялады.
Өсімдіктерге қолайлы жағдай жасау үшін микроклиматты автоматты басқару, суару және су дайындаудың заманауи инженерлік жүйелерімен жабдықталмақ.
Ботаникалық бақ өсімдіктердің бірегей түрлері өсетін орын ғана емес, экологиялық мәдениеттің, білім берудің және ішкі туризмнің дамуына қызмет ететін, аймақ тұрғындары мен қонақтары жиі бас қосатын мекенге айналады.
Мұнда студенттер, мектеп оқушыларының, табиғат жанашырларының танымын кеңейтуге барлық жағдай жасалмақ әрі Ботаникалық бақтың ерекше атмосферасы келушілерге жайлылық сыйлайды.
Айта кетейік, ұйымдастырушылар тропикалық жылыжайда ауа ылғалдылығын табиғи деңгейде ұстап тұратын тұман қалыптастыру жүйесі жұмыс істейді деп отыр. Сондай-ақ артық ылғалды бұрып әкететін дренаж жүйесі қарастырылған.
Бұдан бөлек ботаникалық бақта білім беру іс-шараларын өткізуге арналған 40 орындық дәріс залы да бар. Екінші қабатта әкімшілік кабинеттер, демалыс аймағы, асхана және жылыжайларға панорамалық көрініс ашылатын шолу көпірі орналасқан.
