Қалада ерекше нысан-Атомшылар аллеясы салтанатты түрде ашылды. Шараға қала тұрғындары, қонақтар мен ардагерлер қатысты.
Аллея Бұхарбай батыр көшесінің бойынан орын тепкен. Бұл жерге жарық шамдары орнатылып, қоқыс жәшіктері қойылған. Сондай-ақ көлеңке саялайтын орындар, балаларға арналған ойын алаңы және түрлі гүлдер аллеяға сән беріп, тұрғындардың жанға жайлы демалысына жағдай жасамақ.
Аллеяның ашылу рәсімінде Marubeni Kharasan филиалының бас менеджері Йошинори Сакамото, Қытайдың бас ядролық энергетикалық корпорациясы (CGNPC) URC директорының орынбасары Сюй Цзюньмей және «Қызылқұм» ЖШС бас директоры Айдүйсенов Бағдат Әбжаппарұлы қала халқымен бірге тал егу ісіне үлес қосты.
Жаңа аллея алдағы уақытта Қызылорданың ажарын ашып, тұрғындар тынығып серуендейтін сүйікті мекенге айналмақ. Мұнда бой көтерген 10 түп ағаш айналаға жасыл желек сыйлап, аллеяның ажарын аша түспек
Аллеяның құрылысына демеушілік жасаған “Қызылқұм” ЖШС-ның уран кеніші Қызылорда облысы, Жаңақорған ауданы аумағында, тарихи Қорасан ата кесенесіне жақын маңда орналасқан. Бүгінде мұнда өндірілетін уран рудасы ел экономикасының қарқынды дамуына айтарлықтай серпін беріп отыр.
Қазіргі таңда компанияда 292 адам тұрақты жұмыспен қамтылған, ал ілеспе өндірістерді қоса есептегенде бұл көрсеткіш 500-ден асады. 2025 жылға қарай кен орнында уран өндіру көлемі 20 мың тоннадан асып отыр.
