Фото: Қазақстан футбол федерациясы
Қазақстан құрамасының жартылай қорғаушысы Рамазан Оразов ресми түрде «Елімай» клубына ауысты, деп хабарлайды Salemnews.kz ақпарат агенттігі.
Рамазан Оразов Данияның «Силькеборг» клубынан келісімшартсыз кетіп, Қазақстанға оралды. Енді ол Премьер-Лигадағы жарысын «Елімай» сапында жалғастырады.
Футболшы – «Қайрат» клубының тәрбиеленушісі. Бұған дейін ол Қазақстанда «Қайрат», «Ақтөбе», «Тобыл» және басқа да командалардың намысын қорғаған. Сонымен қатар, Рамазан Словенияда («Копер»), Ресейде («Чайка») және Данияда тәжірибе жинақтаған.
Қазақстан Премьер-лигасында Оразов 75 матчқа қатысып, 2 гол соғып, 5 нәтижелі пас берген.
Еске салсақ, бұған дейін «Елімай» шетелде өнер көрсеткен екі қазақстандық футболшымен келісімшартқа отырған еді. Олар — ресейлік «Волгарьда» ойнаған Ақмәл Бахтияров пен словакиялық «Кошице» клубының бұрынғы ойыншысы Ғалымжан Кенжебек.
