Фото: скриншот
ҚР Парламенті Мәжілісінің депутаты Ерболат Саурықов Атырау облысы, Исатай ауданы, Аққыстау ауылындағы құрылысы тоқтап тұрған үйлердің қауіпті екенін айтып, түбегейлі шешімін табуға септігін тигізетінін жеткізді, деп хабарлайды Salemnews.kz ақпарат агенттігі.
Аққыстау ауылына сапарым барысында құрылысы тоқтап қалған үш қабатты, 60 пәтерлік 3 тұрғын үй нысанын аралап көрдім.
Бұл үйлердің құрылысы 2019 жылы басталғанымен, қабырғаларында пайда болған жарықтарға байланысты апаттық деп танылып, әкімдік тарапынан құрылыс жұмыстары тоқтатылған екен.
Қазіргі уақытта бұл үйлерге 2,3 млрд теңге қаражат жұмсалған екен. Дегенмен, ғимараттардың тек қаңқасы ғана тұрғызылып, ішкі әрлеу, инженерлік жүйелер мен абаттандыру жұмыстары мүлде жүргізілмеген.
Кездесу барысында тұрғындар мен жергілікті әкімдік өкілдері бұл нысандардың аяқталуы — баспана кезегінде тұрған азаматтар үшін аса маңызды екенін жеткізді.
Мен бұл мәселені тиісті жауапты органдарымен бірлесе қарап, шешу жолдарын қарастыратынымды айттым.
Сонымен қатар, “ҚазҚСҒЗИ” АҚ-тан (Қазақ Құрылыс және Сәулет ғылыми-зерттеу институты) арнайы мамандар шақырып, тұрғын үй кешені бойынша нақты шешім қабылдау қажет екенін атап өттім.
Құрылысы тоқтап тұрған бұл үйлер — тек Аққыстау тұрғындарының ғана емес, жалпы өңірлік дамудың өзекті мәселесі ретінде қаралуы тиіс деп есептеймін, — дейді депутат Ерболат Саурықов.
