Қырғыз еліндегі Чатқал аңғарында Ресей, Қазақстан және Қырғыз елінен келген туристер үш күннен бері тау аймағынан шыға алмай отыр. Қатты жауыннан кейін Қара-Токой көлі маңындағы өзендердегі су деңгейі көтеріліп, көпірлерді ағызып әкеткен, деп хабарлайды salemnews.kz ақпарат агенттігі.
24.kg басылымының мәліметінше, туристер Чатқал өзенінің салаларының арасында қалып қойған. Олар Талас облысы шекарасына жақын аумақта орналасқан.
Турист Вильданның айтуынша, олардың тобында 10 адам бар, оның үшеуі – бала. Жақын маңда Бішкектен келген тағы бір туристік топ орналасқан, онда шамамен 30 адам бар.
«Біз мұнда үшінші күн отырмыз. Көпірлер қалпына келтірілгенше күту керектігі айтылды. Бүгін жексенбі болғандықтан, жөндеу жұмыстары жүргізілмей жатыр. Бақытымызға қарай, көліктеріміз бен шатырларымыз бар, түнеуге жағдай жасалған. Барлығының жағдайы жақсы, үрей жоқ», – деді ол.
Туристердің айтуынша, өзеннен өз күштерімен өту мүмкін емес, өйткені ағысы өте қатты. Қырғызстанның Төтенше жағдайлар министрлігінің қызметкерлері азық-түлікті өзеннің арғы бетіне лақтырып жеткізіп жатыр.
Сондай-ақ жергілікті тұрғындар да туристерге көмек көрсетуде.
«Бізге көмектесіп жатқан барлық адамға алғысымыз шексіз. Шопандар, жақын маңдағы ауыл тұрғындары, ТЖМ қызметкерлері – барлығы қолдан келгенше қолдау көрсетіп, азық-түлік әкеліп жатыр», – деді Вильдан.
Қазір туристер көпірлердің қалпына келтірілуін күтіп отыр. Одан кейін ғана олар тау аймағынан қауіпсіз шыға алады.
