Республикалық «24 kz» телеарнасының «Таза Қазақстан» республикалық экологиялық бағдарламасы туралы арнайы сюжетіне сәйкес, тазалық көрсеткіші бойынша Қызылорда облысы бірінші орынға шықты. Бұл жетістік, ең алдымен, облыс орталығы Қызылорда қаласының санитарлық тазалық пен абаттандыруға ерекше көңіл бөлгенінің нәтижесі.
Қаладағы тазалық жұмыстары «Қызылорда тазалығы» коммуналдық кәсіпорнына жүктелген. Бұл мекеме 500-ден астам көшенің санитарлық тазалығын қамтамасыз етеді. Қаладағы 916 көпқабатты тұрғын үй мен жеке сектордың 563 көшесінен тұрмыстық қатты қалдықтар тұрақты түрде шығарылып, жыл басынан бері полигонға 65 мың тоннадан астам қоқыс тасымалданды. Қаланың тазалығы мен тұрмыстық қалдықтарды шығару жұмыстарына 93 арнайы техника жұмылдырылған.
Қызылорда қаласындағы бұл жүйелі және ауқымды тазарту, абаттандыру шаралары — Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» экологиялық акциясының жемісі. Қаланың тазалығы мен қоршаған ортаны қорғау бағытындағы бұл шаралар тұрғындар тарапынан зор қолдау тауып, қала мәдениеті мен экологиялық ахуалының жақсаруына үлкен үлес қосуда.
