Мемлекет басшысы Қасым-Жомарт Кемелұлы Қазақстан халқы Ассамблеясының отыз төртінші сессиясында: «Былтыр еліміздің рухани және тарихи-мәдени ордасы – Түркістанда жаңа Достық үйі ашылды. Достық үйлері тағы бірнеше қала мен аудан орталығында ашылады деп жоспарлануда. Мен бұл бастаманы қолдаймын. Біз қоғамдық келісім инфрақұрылымын біртіндеп кеңейте беруіміз керек» деген еді.
Осы орайда, биылғы Ассамблеяның 30 жылдығы қарсаңында Қызылорда қаласында құны 3 млрд 800 млн теңгені құрайтын заманауи «Достық үйі» салынып жатыр. Бұл ғимарат этномәдени бірлестіктер мен Ассамблея белсенділерінің қажеттіліктерін толық қамтамасыз етіп, аймақтың бірлігі мен ынтымағын нығайтуға ерекше үлес қосады.
«Достық үйінде» 200 орындық концерт залы, екі конференц-зал, этномәдени бірлестіктерге арналған кабинеттер, сондай-ақ белсенді жастар мен үкіметтік емес ұйымдарға арналған жеке залдар қарастырылған. Жаңа нысан қаламыздың көркін ашып, маңызды мәдени орталыққа айналатыны сөзсіз.
Айта кетейік, жақында облыс әкімі Нұрлыбек Нәлібаев жауапты сала басшыларымен бірге жаңадан бой көтерген «Достық үйінің» құрылыс жұмыстарын көрді және қала әкімдігі де құрылыс қарқынын бақылауда ұстауда.
