Әлемдегі ең ірі мегаполистердің бірі Мехико біртіндеп жер астына кіріп барады. Ғалымдардың айтуынша, қала ай сайын орта есеппен 1,3 сантиметрге төмендеп келеді, ал кей аудандарда бұл көрсеткіш 2 сантиметрге дейін жеткен, деп хабарлайды salemnews.kz ақпарат агенттігі.
Мәселенің басты себебі – жерасты суының шамадан тыс тартылуы. Қала ежелгі су қабатының үстінде орналасқан және ауызсудың шамамен 60%-ын сол жерден алады. Алайда ондаған жыл бойы үздіксіз су алу салдарынан топырақ босап, жер қабаты шөге бастаған.
Мехико бұрын ацтектердің Теночтитлан қаласының орнында салынған. Ол 1325 жылы Тескоко көлінің ортасындағы аралда бой көтерген. Кейін испан конкистадорлары көлді құрғатып, оның табанында қазіргі алып мегаполис пайда болды. Қазір бұл агломерацияда шамамен 22 миллион адам тұрады.
Ғалымдар мәселенің ауқымын ғарыштан да бақылап отыр. NASA және ISRO бірлесіп жасаған NISAR спутнигі жер бедеріндегі ең ұсақ өзгерістерді де тіркей алады. Соңғы мәліметтерге сәйкес, 2025 жылдың қазанынан 2026 жылдың қаңтарына дейін кей аудандар жылына 24 сантиметрден астам шөккен.
Ең қатты зардап шеккен нысандардың бірі – Benito Juárez International Airport халықаралық әуежайы. Ал қаланың символына айналған Angel of Independence монументінің астына жер төмендегендіктен қосымша баспалдақтар орнатуға тура келген.
Сарапшылардың айтуынша, урбанизация да жағдайды ушықтырған. Жаңа ғимараттар мен инфрақұрылым сазды топыраққа қосымша салмақ түсіріп жатыр.
Ғалымдар бақылауды жалғастырып, бұл деректер болашақта табиғи апаттар мен климаттық өзгерістерді зерттеуге де көмектеседі деп есептейді.
