Қазақстанның халық жазушысы, көрнекті ақын Мұхтар Шахановтың жары Ханшайым Шаханова мемлекет басшысы Қасым-Жомарт Тоқаевқа ашық хат жолдап, ақынның соңғы тілегін орындауға қолдау көрсетуді сұрады. Хат 15 сәуірде «Е-Өтініш» жүйесінде тіркеліп, «ҚР Президент әкімшілігіне» жолданған.
Хатта Мұхтар Шахановтың қазіргі таңда ауыр дертке шалдыққаны және жағдайының күрделі екені айтылған. Автордың мәлімдеуінше, ақынның ең соңғы әрі маңызды аманаты – өзі дүниеден өткен жағдайда Отырар өңіріндегі Арыстанбаб кесенесінің іргесіне жерлену.
«Мұхтар Шаханов – тек ақын ғана емес, ұлттық руханияттың көрнекті өкілі, ел тәуелсіздігі мен ана тілінің мәртебесі жолында қызмет еткен тұлға», – делінген хатта.
Сонымен қатар, Арыстанбаб кесенесі республикалық маңызы бар тарихи-мәдени ескерткіш саналатындықтан, мұндай жерлеу рәсімін өткізу үшін арнайы рұқсат қажет екені атап өтіледі. Осыған байланысты Ханшайым Шаханова Президенттен тиісті мемлекеттік органдарға, атап айтқанда, Мәдениет және ақпарат министрлігі мен Түркістан облысының әкімдігіне тапсырма беруді сұраған.
Қазіргі уақытта аталған өтінішке қатысты ресми жауап жарияланған жоқ.
