Елімізде Қазақстан анимациясы апталығы басталды, деп хабарлайды salemnews.kz ақпарат агенттігі.
Бұл – балаларға, жасөспірімдерге және отбасылық көрерменге арналған отандық мультфильмдердің тегін көрсетілімдерінен тұратын мәдени жоба.
Жоба аясында заманауи туындылар көрермен назарына ұсынылады. Тегін сеанстар Астанадағы «Арсенал» және Қарағандыдағы «Сарыжайлау» кинотеатрларында өтеді.
Сонымен қатар ҚР Қарулы Күштерімен бірлескен жоба аясында көрсетілімдер елордадағы Әскери-патриоттық орталықта және еліміздің шалғай өңіріндегі әскери гарнизондарында – Семей, Отар, Сарыөзек, Алматыда ұйымдастырылмақ. Бағдарламада түрлі жас ерекшелік пен талғамға сай туындылар бар. Толықметражды ертегілермен қатар, авторлық қысқаметражды туындылар да ұсынылады.
Көпшілік 2025 жылдың жаңа мультфильмдері мен «Қазақфильм» мен Ұлттық киноны қолдау орталығының алтын қорына енген үздік ленталарды тамашалай алады.
