Фото: сайт сената парламента Казахстана
Тележүргізуші ұлының туған күнінде болған оқиғаны баяндап, бала тәрбиесі жайлы сөз қозғады, – деп жазды Aikyn.kz.
Журналист ата-аналарға баламен көп сөйлесуге кеңес берді.
«Құндылықтар дейсіз бе?! Балаларыңызбен сөйлесіңіздерші! Әсіресе жатарда. Көп нәрсе ұғасыз. Біз не істеп жүрміз? Қалай өмір сүріп жатырмыз? “Адамдар бай өмірді жақсы көреді! Инстаграмнан соны көрсету керек!” деді маған жақында бір эксперт. Мен ақымақ екенмін! Мен шынайылық бірінші орында ма десем… Тәуелсіздіктің алғашқы жылдары телевизордан көрсететін “Просто Мариялар” есіме түсіп кетті. Стандарт хрущевкаларда қант пен макаронды талонға алып отырған халық ауызынан суы ағып “бай”өмірді көріп отыратын еді. Жаңағы құндылықтармен өскен бір бала Әлімнің туған күніне алдымен қонақ болып келіп, содан соң мен ұлыма сол кеште сыйлаған сағатты түкке тұрғысыз қылыпты», — деп бастаған әңгімесін.
Журналист ұлы туған күніне сағат алғызғанын айтады.
«Әлім әкесінен көрген жай ғана сағатты алғызды. Құны 27 мың теңге екен. Жақсы деп, сыйлық жасадым. Туған күннен кейін сөз сөйлеп, тілек айтқан құрдас баласы бірнеше күннен кейін Әлімнің алдынан шығып, сағатын шешіп, «Сенің сағатың 27 мың, ал менікі қанша екенін білесің бе? 9 млн! Әкем сыйлады» депті. Балам не айтарын білмей, сен не дедің десем «әй, ол неадекват» дейді. Бір қарасам, көзіне жас толып кеткен. «Ал менің әкем «Семей полигоны» туралы фильм жасаған, журналист, жазушы болған! Мамам қандай менің!» деп ызаға булығып отыр. Бала бәрін түсінеді, бәрін ұғады. 9 млн-ға мен өзіме де сағат ала алмаймын. Алмаймын да! Мен ол категорияда ойлайтын адам емеспін. Мүмкін заманнан қалып қойған да шығармын. Бірақ аш адамның алдында, ұртым май-май болып, кекіріп отырып, пәлсәпа соғып, ақыл айтпаймын. Осыны ұқтыратын ата-аналар, қайдасыңдар?» — дейді тележүргізуші.
