Қызылорда қаласында тұрғындардың өмір сүру сапасын арттыру, қалалық ортаны жақсарту және заманауи инфрақұрылым қалыптастыру бағытындағы жұмыстар жүйелі түрде жүзеге асырылуда. Соңғы жылдары шаһарда аулаларды абаттандыру, қоғамдық кеңістіктерді дамыту, көгалдандыру және санитарлық тазалық жұмыстарын жетілдіру бойынша ауқымды жобалар қолға алынды, деп хабарлайды Salemnews.kz ақпарат агенттігі.
Бұл туралы баспасөз конференциясында Қызылорда қаласының әкімі Нұржан Ахатов баяндады.
Қаланың жайлылығы ең алдымен тұрғындардың күнделікті өмір сүретін ортасынан басталады. Осыған байланысты биыл көпқабатты тұрғын үйлердің аулаларын абаттандыруға ерекше көңіл бөлінуде. Жоба аясында балалар ойын алаңдары, шағын футбол алаңдары және воркаут аймақтары салынуда.
Қазіргі таңда қала бойынша 26 көпқабатты тұрғын үйдің ауласында құрылыс жұмыстары басталды. Жобаның жалпы құны 1,9 млрд. теңгені құрайды. Бұл жұмыстар тұрғындардың бос уақытын тиімді өткізуіне мүмкіндік беріп, аулаларды қауіпсіз әрі жайлы қоғамдық кеңістікке айналдыруды көздейді.
Қала аумағын абаттандыру бағытындағы жұмыстар аулалармен ғана шектелмейді. Тұрғындарға қолайлы демалыс орындарын қалыптастыру мақсатында қоғамдық кеңістіктерді жаңғыртуға да басымдық беріліп отыр.
Осы бағыттағы маңызды жобалардың бірі – Президент саябағын қайта жаңғырту жұмыстары. Биыл абаттандыру саласына аймақ басшысының қолдауымен 11 млрд. 648 млн. теңге бөлініп, бірқатар маңызды жобалар іске асырылды.
Аталған қаржының басым бөлігі Президент саябағын қайта жаңғыртуға бағытталды. Жоба аясында саябақ аумағына мыңдаған ағаш көшеттері, сәндік бұталар мен көпжылдық гүлдер отырғызылды. Сонымен қатар заманауи спринклерлік және тамшылатып суару жүйелері орнатылып, жасыл желекті күтіп-баптаудың тиімді жүйесі қалыптастырылды.
Жаңғырту жұмыстары барысында тұрғындардың қауіпсіздігі мен жайлылығына да ерекше назар аударылды. Саябақ аумағында автожол және автотұрақ құрылыстары жүргізілді. Нәтижесінде қала тұрғындары үшін демалуға, серуендеуге және уақытты тиімді өткізуге арналған заманауи қоғамдық кеңістік қалыптасты.
Бүгінде Президент саябағы жаңартылған келбетімен тұрғындарға пайдалануға берілді. Бұл нысан Қызылорданың сәулеттік келбетін айқындайтын маңызды орындардың біріне айналып, қала тұрғындарының сүйікті демалыс орындарының қатарын толықтырды.
Қаладағы тағы бір ауқымды жоба – Сырдария өзенінің қорғаныс бөгеттерін нығайту жұмыстары. Бұл мақсатқа 2,9 млрд. теңге бөлінді. Жоба аясында бөгет бойымен екі жолақты жаяу жүргіншілер және велосипед жолы салынуда.
Аталған бастама бір жағынан қаланы су тасқынынан қорғауға бағытталса, екінші жағынан тұрғындар үшін жаңа серуендеу және демалыс аймағын қалыптастыруға мүмкіндік береді.
Жағалау аумағын дамытудың жалғасы ретінде Астана мөлтек ауданы мен Президент саябағын байланыстыратын жаяу жүргіншілер көпірінің құрылысы жоспарланған. Жоба мемлекеттік сараптаманың оң қорытындысын алып, құрылыс жұмыстарын бастауға дайын.
Бұл көпір қаланың екі маңызды аумағын байланыстырып қана қоймай, тұрғындар үшін жаңа жаяу бағыт қалыптастырып, қалалық ортаның тартымдылығын арттыруға ықпал етеді.
Сонымен қатар Қызылорда қаласында санитарлық тазалық жұмыстарына да ерекше назар аударылуда. Қала аумағының кеңеюіне байланысты бұл бағыттағы жұмыстардың көлемі айтарлықтай артқан.
Егер осыдан он жыл бұрын «Қызылорда тазалығы» мекемесі шамамен 240 көшеге қызмет көрсетсе, бүгінде қала аумағында күн сайын 826 көшеде санитарлық тазалық жұмыстары жүргізілуде.
Қала тазалығын қамтамасыз ететін қызметкерлердің еңбек жағдайын жақсарту мақсатында олардың жалақысы көтеріліп, әлеуметтік қолдау шаралары көрсетілуде.
Қызылордада жүзеге асырылып жатқан абаттандыру, көгалдандыру және инфрақұрылымдық жобалар қаланың жаңа келбетін қалыптастыруға бағытталған. Жаңарған аулалар, жаңғырған Президент саябағы, абаттандырылып жатқан жағалау аумағы және жүйелі жүргізіліп жатқан тазалық жұмыстары тұрғындарға жайлы әрі қауіпсіз орта құруға мүмкіндік беруде.
Қаладағы бұл жұмыстар алдағы уақытта да жалғасып, Қызылорданың заманауи әрі қолайлы шаһар ретінде дамуына жаңа серпін бермек.
