Stan.kz
Тараздық қазақ қызы Дубайда жапон жігітімен танысып, махаббат хикаясын бөлісті
Таразда дүниеге келген 24 жастағы Элеонора үш жыл бұрын жұмыс бабымен Дубайға көшіп, сол жерде жапониялық Юмамен танысқан. Қазір жұп бірге саяхаттап, бір-бірінің тілі мен мәдениетін үйреніп жүр, деп salemnews.kz ақпарат агенттігі Stan.kz сайтына сілтеме жасап хабарлайды.
Элеонора Таразда өскен. Кейін Астанада тұрған, бүгінде оның ата-анасы елордада тұрады. Мамандығы бойынша қонақүй және мейрамхана бизнесінің маманы.
Үш жыл бұрын бойжеткен Дубайға қоныс аударып, қонақүй саласында жұмыс істей бастаған. Қазір ол әлеуметтік желіде белсенді болып, саяхаттары мен әртүрлі мәдениет өкілдері құрған жұптың күнделікті өмірі туралы бөліседі.
Элеонораның айтуынша, Юмамен оларды әріптесі таныстырған. Алғашқы кездесуге екеуі жапон мейрамханасына барған.
«Алғаш көргеннен-ақ ол маған өте жағымды әсер қалдырды. Нағыз джентльмен сияқты көрінді. Өте мұқият әрі қамқор болды: стақанымның бос қалмауын қадағалап, тамақ салып беріп, бәрі ұнап жатқанын сұрап отырды. Әңгімеміз де бірден жеңіл өрбіді», – дейді Элеонора.
Қазір жұп көбіне ағылшын тілінде сөйлеседі. Дегенмен екеуі де бір-бірінің ана тілін меңгеруге тырысып жүр. Элеонора жапон тілін арнайы курста оқыса, Юма қазақ тілін үйреніп жүр.
Юманың қазақша сөйлеуге деген талпынысы Элеонораның туыстарына да ерекше әсер қалдырған.
«Ол біраз қазақша сөздер мен тіркестерді үйреніп алды. Қазақстанға бірге келгенімізде қазақша сөйлеп, тіпті туыстарымды таңғалдырды. Бұл менің отбасыма ерекше жағымды әсер етті», – дейді бойжеткен.
Юма Қазақстанға алғаш келгенде қазақ халқының қонақжайлығы мен үлкен отбасылық басқосуларына ерекше таңғалған. Ал жұп бүгінде екі түрлі мәдениетті жақындастырып, бірге саяхаттап, болашаққа ортақ жоспар құрып жүр.
