2025 жылғы 16 маусым күні Тараз қаласында
Шерхан Мұртаза атындағы Халықаралық Тараз инновациялық университетінде
«МЕНІҢ ӘКЕМ» республикалық шығармашылық байқауының марапаттау рәсімі өтті.
Бұл байқау – Қазақстан Республикасы Оқу-ағарту министрлігінің қолдауымен,
«Ұждан» әлеуметтік-мәдени жобасы аясында ұйымдастырылды.
«Ұждан» жобасы – әке рөлін қоғамда насихаттап, отбасылық құндылықтарды дәріптеуге арналған. Жоба аясында подкасттар, сараптамалық сұхбаттар мен түрлі форматтағы тәрбиелік мәні бар контенттер жүзеге асырылып келеді.
«Менің әкем» байқауы – осы жобаның ең ірі бастамасына айналды.
Байқауға еліміздің түкпір-түкпірінен 2 000-ға жуық оқушы қатысып, өздерінің жүрекжарды шығармаларын жолдады. Әке бейнесін көркем сөзбен бейнелеп, ұлттық тәрбие мен адамгершілік құндылықтарды шынайы жеткізген оқушылардың ішінен үздіктер анықталып, Таразда арнайы марапатталды.
Жамбылдық Нұрай Асамбай мен Қызылорда облысынан арнайы келген Кәусар Райымбек бірінші орынға ие болды. Жүлделі орын иегерлеріне дипломдар мен қаржылай сыйлықтар табысталды. Марапаттарды университет ректоры, профессор Сарыбеков Махметғали Нұрғалиұлы табыстады.
Сондай-ақ Шерхан Мұртаза атындағы арнайы жүлдені Айзере Айтбекке
Шерхантану ғылыми-зерттеу орталығының басшысы Қаракөз Өмірзаққызы салтанатты түрде табыс етті.
Әсерлі шығарма жазған бірқатар оқушыларға Мәжіліс депутаттары Бақтықожа Ізмұхамбетов, Дәулет Мұқаев, Ринат Зайытов, Ерболат Саурықов, Тимур Қырықбаев, Айдос Сарым, Нартай Аралбайұлы және ақын-жазушылар Бауыржан Бабажанұлы, Олжас Сәндібек, Толқын Қабылша, Қанат Әбілқайыр жолдаған кітаптар мен құттықтаулар берілді.
Байқауда ерекше атап өтуге тұрарлық бір туынды — жұмыс барысында жол апатынан қаза тапқан жамбылдық полиция қызметкері, “100 жаңа есім” жобасының жеңімпазы, Мерейлі отбасы байқауының финалисі, өзінің үш баласынан бөлек 8 баланы балалар үйінен асырап алған қамқор әке Ғалым Арыстанбаевтың баласы жазған шығарма болды. Әке туралы жан тебірентерлік туындысы үшін Нұрболат Ғалымұлы Қазбек ІІІ орын иеленіп, көпшіліктің жүрегін толқытты.
Бұл марапат – өмірден ерте озған әкенің аманатына деген құрмет ретінде қабылданды.
Сонымен қатар, Жамбыл облыстық мәслихатының депутаты Оралхан ДӘУІТ «ӘКЕЛЕР ОДАҒЫ» республикалық қоғамдық бірлестігінің атынан балалар мен отбасы тақырыбын ел көлемінде қолдағаны үшін Шерхан Мұртаза атындағы Халықаралық Тараз университетінің ректоры
Сарыбеков Махметғали Нұрғалиұлына
алғыс хат табыстады.
Кешке зиялы қауым өкілдері, ұстаздар мен ата-аналар, БАҚ өкілдері қатысты.
«Менің Әкем» байқауы әке тұлғасына деген құрметті ұлықтап қана қоймай, қазақ қоғамындағы ұрпақ тәрбиесінің терең мағынасы бар екендігін тағы бір мәрте дәлелдеді.
