Конституциялық сот Оңтүстік Корея президенті Юн Сок Ёльге қатысты импичментті заңды деп танып, оны қызметінен босатты. Бұл шешім 2024 жылдың желтоқсан айында әскери төтенше жағдай енгізуге талпынғаны үшін қабылданды, деп хабарлайды salemnews.kz Dalanews.kz-ке сілтеме жасап.
Yohnap агенттігінің мәліметінше, сот шешімі дереу күшіне енген. Осыған байланысты елде 60 күн ішінде кезектен тыс президенттік сайлау өтуі тиіс. Алдын ала болжам бойынша, сайлау 3 маусымға белгіленуі мүмкін.
Өткен жылдың 3 желтоқсанында президент Юн Сок Ёль оппозицияны “мемлекетке қарсы әрекет жасады” деп айыптап, елде әскери төтенше жағдай жариялады. Ол әскери күштер мен полиция қызметкерлерін Ұлттық жиналыс ғимаратына жіберіп, депутаттардың бұл жарлықты жою туралы дауыс беруіне кедергі келтірді және бірқатар саясаткерлерді қамауға алуға бұйрық берді.
Бұған жауап ретінде депутаттар, оның ішінде билеуші партия мүшелері де, жиналып, әскери төтенше жағдайды жою жөнінде бірауыздан шешім қабылдады. Артынша, желтоқсанның ортасында Ұлттық жиналыс президентке Конституция мен заңдарды бұзды деген айыппен импичмент жариялады.
Сот Юн Сок Ёльге тағылған айыптардың басым бөлігін негізді деп тапты. Атап айтқанда, оның әскери төтенше жағдай енгізуге ешқандай заңды құқығы болмағанын және қарулы күштерді парламенттің жұмысына кедергі жасау үшін пайдаланғанын анықтады.
Қазіргі таңда 64 жастағы Юн Сок Ёльге “бүлік жасауға талпынғаны” үшін қылмыстық іс қозғалып отыр. Ол – Оңтүстік Корея тарихында қызметтегі кезінде тұтқындалған алғашқы президент.
