Фото: istockphoto.com
Ұлыбританияда миллиондаған адам курьерді өз отбасы мүшелерінен жиі көреді. Generation Logistics компаниясы жүргізген сауалнама нәтижесі бойынша, 27 миллион британдық курьерді туыстарына қарағанда жиі кездестіретінін мойындаған. Әсіресе әр үшінші адам курьермен өз балаларына қарағанда жиі жолығатынын айтқан, деп хабарлайды Salemnews.kz ақпарат агенттігі.
Зерттеу көрсеткендей, респонденттердің 10 пайызға жуығы аптасына бес немесе одан да көп cәлемдеме қабылдайды.
Generation Logistics өкілі Бетани Уиндзор бұл тенденцияны былай түсіндіреді: «Курьерлер тек тапсырыс жеткізуші ғана емес. Олар сенім орнатып, қоғаммен тығыз байланыс орнатады. Қарапайым қызмет енді көпшілікке қолжетімді, адаммен жұмыс істеуге негізделген мамандыққа айналды».
Зерттеу әйелдердің 75 пайызы курьермен қысқа болса да әңгіме айтатынын, ал 42 пайызы оларды танитынын жеткізген. Ер адамдар арасында бұл көрсеткіш әлдеқайда төмен: 63%-ы курьердің атын білмейді, ал үштен бірі мүлде сөйлеспейтінін мойындаған.
Британияның ең достыққа бейім қалалары – Глазго мен Бристоль. Бұл екі қалада тұрғындардың 78 пайызы курьермен сөйлесетін болса, Бристольде 57 пайыз тұрғын өзінің тұрақты жеткізушісінің атын біледі.
Ұлыбританияда бүгінде әр төртінші сауда онлайн жасалады, ал курьер нарығы 2033 жылға дейін жылына орта есеппен 24,1% өседі деген болжам бар.
Толық нұсқасына гиперсілтеме беруді ұмытпаңыз: https://turkystan.kz/article/264085-britandyqtardyn-kobi-kurerlerdi-oz-tuystarynan-zii-koredi-zertteu
