ҚР Оқу-ағарту министрі Ғани Бейсембаев «Жайлы мектеп» жобасы аясында екі жылда 460 мың оқушы орнына арналған 217 заманауи мектеп салынғанын айтты, деп хабарлайды Salemnews.kz ақпарат агенттігі.
2022 жылы Мемлекет басшысы Қазақстан халқына Жолдауында «Жайлы мектеп» ұлттық жобасын жүзеге асыруды тапсырды. Былтыр ауқымды құрылыс жұмысы басталды. Бүгінге дейін 105 мектеп салынды. Биыл тағы 112 мектептің құрылысы аяқталып, іске қосылады, — деді министр.
Ғани Бейсембаев «Жайлы мектеп» жобасы қала мен ауыл мектептері арасындағы алшақтықты жоюға бағытталған стратегиялық бастама екенін атап өтті.
Жобаның мақсаты – еліміздің барлық өңірлерінде кез келген балаға қолжетімді жаңа форматтағы білім беру ұйымдарын құру. Жоғары сапалы білім беру стандарттарын жаппай енгізу арқылы, әр баланың жан-жақты дамуына және өз әлеуетін толық ашуға теңдей мүмкіндіктер жасау, — деді ҚР Оқу-ағарту министрі.
