Фото: freepik.com
Қостанай облысындағы ветеринарлық мекемелерде қызметтік автокөліктерді заңсыз пайдалану бойынша шамамен 40 жағдай анықталды, деп хабарлайды Salemnews.kz ақпарат агенттігі.
Аймақтағы Мемлекеттік қызмет істері агенттігі департаменті жүргізген мониторинг нәтижелері бойынша, ведомствоға қарасты ұйымдардың көліктері жұмыс уақытынан тыс, оның ішінде демалыс және мереке күндері жеке мақсаттарда үнемі пайдаланылып келген.
«Мемлекеттік ресурстар – жеке меншік емес. Әрбір теріс пайдалану жағдайына қағидатты баға беріледі», – деп атап өтті ведомство өкілдері.
Бұзушылықтар бірнеше ауданда тіркелген. Қарабалық және Қостанай аудандарындағы ветеринариялық станциялардың басшылары тәртіптік жауапкершілікке тартылды. Алтынсарин және Меңдіқара аудандарындағы станциялардың жүргізушілеріне де осындай шаралар қолданылды. Қалған басшыларға ресми ескерту жасалды.
«Мемлекеттік мүлікті мақсатына сай пайдаланбау – бұл заң мен қызметтік әдепті тікелей бұзу», – деп ескертті агенттік.
