Фото: Olympic.kz
Халықаралық дзюдо федерациясы (IJF) Будапештте (Венгрия) болған Әлем чемпионатынан кейін спортшылардың әлемдік рейтингін жаңартты. Жаңартылған мәліметтерге сәйкес, үш қазақстандық спортшы өз салмақ дәрежесінде үздік 10 дзюдошының қатарына енді, деп хабарлайды Salemnews.kz ақпарат агенттігі.
Туризм және спорт министрлігінің хабарлауынша, әйелдер арасындағы бәсекеде отандық дзюдо тарихында алғаш рет финалда белдесіп, күміс жүлдегер атанған Әбиба Әбужақынова (48 кг) рейтингте екі саты жоғарылап, 5662 ұпаймен ІІ-орынға жайғасты.
Ерлер арасында Париж Олимпиадасының жеңімпазы, әлем чемпионы Елдос Сметов (9-орын) биылдыққа татамиге шықпаса да, әлі де әлемнің ең үздік 10 дзюдошының қатарында тұр. Сондай-ақ Париж Олимпиадасының қола, әлем біріншілігінің күміс жүлдегері Ғұсман Қырғызбаев әлем чемпионатындағы нәтижесіне байланысты рейтингте 7 саты көтеріліп, ТОП-10 палуанның қатарына қосылды.
Бұдан бөлек, 60 келідегі Мағжан Шамшадин 19-орынға көтерілсе, Абылайхан Жұбаназар (81 кг) мен Нұрлыхан Шархан (100 кг) рейтингтегі орындарын сақтап қалды. Абылайхан 14-орында, Нұрлыхан 26-орында тұр. Әлем чемпионатында 90 келіде белдескен Мейірлан Максим бірден 36 саты көтеріліп, 41-орынға жоғарылады. Ол жаһандық доданың 1/8 финалында төрт дүркін әлем чемпионы (үшеуі командалық сайыста) жапониялық Гоки Тадзимадан жеңіліп қалған еді.
100 келіден жоғары салмақта белдесетін Ерасыл Қажыбаев та әлем чемпионатынан кейін жағдайын жақсартып алды. Рейтингте 7 сатыға жоғарылап, ТОП-20 дзюдошының қатарына қосылды.
Айта кетсек, Мажарстан астанасы Будапештте 20 маусымда ересектер арасындағы дзюдодан әлем чемпионаты аяқталды. Жарыс қорытындысы бойынша Қазақстан ұлттық құрамасы бір күміс медаль жеңіп алып, жалпыкомандалық есепте 11-орынға ие болды.
