Қызылорда қаласы — медицина саласында қарқынды дамып келе жатқан өңірдің бірі. Соңғы жылдары заманауи медициналық құрылғылар саны артқанымен қатар, ел денсаулығын жақсартуға бағытталған кешенді шаралар да жүйелі түрде жүзеге асуда. Осы бағыттағы маңызды жобалардың бірі – жаңа облыстық қан орталығы.
Өткен жылы Сырдария өзенінің сол жағалауында бой көтерген бұл заманауи нысан медициналық талаптарға толық сай келеді. 2,4 гектар аумақта орналасқан, 2,7 миллиард теңгеге салынған орталық өңірдегі медициналық мекемелерге сапалы әрі қауіпсіз қан қорының үздіксіз қамтамасыз етілуіне үлкен серпін береді.
Нысан аймақтың барлық 16 аудандық және қалалық медициналық ұйымдарына қызмет көрсетеді. Мұнда жиналған қан қорлары ауыр жарақат алған науқастардан бастап, дүниеге келген сәбилер мен олардың аналарына, сондай-ақ қатерлі ісік және басқа ауыр диагноздары бар адамдарға өмір сыйлайды.
Қан орталығының қызметі – Қызылорда қаласы мен өңірдің медициналық жүйесін нығайтып, қан тапсыру мәдениетін қалыптастыруда маңызды рөл атқарады. Қалалық қоғамдық даму бөлімі ұйымдастырған тұрақты қан тапсыру акциялары қала тұрғындарын ерікті донорлыққа шақырады. Оқу орындары, әскери бөлімдер мен қоғамдық орындарда өткізіліп жатқан бұл шаралар Қызылордада донорлық қозғалысын жүйелі түрде дамытуға бағытталған.
– «Біздің басты мақсатымыз – Қызылордадағы және облыстағы ауруханаларды сапалы қанмен уақытылы қамтамасыз ету. Қанның әртүрлі топтары мен резус-факторларын сақтау, донорлардан алынған қанды үнемі жаңартып отыру – басты жұмысымыз», – дейді облыстық қан орталығының директоры Серік Игембаев.
Жаңа орталықта донорларға барлық жағдай жасалған: ыңғайлы күту залдары, медициналық тексеру бөлмелері, қан тапсыру кабинеттері және жоғары технологиялы аппаратуралар жұмыс істейді. Қан тапсырудан кейін донорларға жеңіл тағам ұсынылады.
Қызылорда қаласының тұрғындары үшін донор болу – тек қана қайырымдылық емес, сонымен қатар денсаулыққа пайдалы әрекет. Мамандардың айтуынша, қан тапсыру ағзаның қорғаныш қабілетін арттырып, жүрек-қан тамырлары жүйесінің қызметін жақсартады.
